شوربة العدس

شوربة العدس من الشوربات التقليدية المصرية و حاجة من الحاجات اللى محدش علمهالى . بالتجربة و الخطأ وصلت للطريقة دى و كل اللى يدوقها يحبها جدًا

المقادير
كيس عدس أصفر - 1/2 كجم
بصلة متوسطة
طمطماية كبيرة
جزرة كبيرة
ثوم ( حوالى رأس صغيرة أو نص رأس كبيرة ) على حسب بتحبوا الثوم قد إيه
شوربة لحم
ملح و فلفل إسود و كسبرة ناشفة و حبهان و مستكة
ملعقة كبيرة صلصة أو ملعقة و نصف
مكعب مرقة دجاج

الطريقة
يغسل العدس جيدًا بالماء البارد ثم ننقعه حوالى ساعة فى ماء دافئ
نحط شوربة اللحم فى الحلة لحد لما تغلى و لو مش عايزين تعملوه بالشوربة ممكن بالماء فقط . بعد لما تغلى نضيف البصل و الجزر و الطماطم و فصوص الثوم . كله مقطع و نتبل بالملح و الفلفل على حسب الطعم . و نهدى النار لحد لما العدس يستوى
بعد ما يستوى العدس نخلطه بالخضروات اللى فيه فى الخلاط .
و ندق شوية ثوم مع كسبرة ناشفة و فى الحلة نحط معلقة سمن و فصين مستكة و بعدين نشوح فيهم الثوم و قبل ما لونه يغمق نضيف الصلصة و مكعب المرقة و نضيف على الخليط ده العدس المطحون فى الخلاط .
نقلب كويس و بعدين نزود ماء إلى أن نصل لقوام الشوربة المطلوب بس هو المفروض مايكونش خفيف
ممكن نحمص مكعبات عيش فينو و نقدمها معاه

ملحوظة ، مع كل مرحلة ندوق علشان نضبط الملح و التوابل

سلاطات متنوعة

سلاطة بابا غنوج
المقادير
1 – باذنجانة متوسطة الحجم
2 – عصير 2 ليمونة
3 – ملعقة كبيرة فلفل مفروم – أو شطة ناشفة حسب الرغبة فى حالة عدم وجدود الفلفل أو الإثنين لو بتحبوا الأكل حامى
4 – ثوم مفروم حوالى نصف رأس متوسطة
5 – أربعة ملاعق كبيرة طحينة
6 – بقدونس للتجميل
7 – ملح و كمون حسب التذوق

الطريقة
نغسل الباذنجان و نسيب فيه الحته الخضراء اللى فوق علشان نمسكه منها و على عين البوتاجاز الصغيرة . نشوى الباذنجانة من جميع الإتجاهات
بعد ما تستوى نسبها تبرد شوية فى طبق و بعدين نقشرها
ممكن نهرس الباذنجان بالشوكة بس الأحسن إننا نفرمها فى الماكينة . يعنى الكبة أو الكيتشن ماشين أو أى مفرمة يدوية علشان يطلع متجانس
بعدين نضيف الفلفل المفروم و الملح و ربع معلقة صغيرة كمون و الطحينة و عصير الليمون و نقلب كله على بعض. و ندوق و نضبط الطعم و تجمل بورقة بقدونس و تقدم

==================================================

==================================================

 
سلاطة البطاطس

بطاطس مسلوقة و مقطعة مكعبات
زيت زيتون + ملح + فلفل + عصير ليمون
بقدونس مقطع
يخلط الزيت و الليمون و عصير الليمون و الملح و الفلفل ثم يضافوا إلى البطاطس و البقدونس . تقلب و تقدم بعد ساعتان أو تترك فى الثلاجة لتانى يوم .
 

==================================================
==================================================

سلاطة الفاصوليا البيضاء
المقادير :
كوب فاصوليا بيضاء – تغسل بماء بارد ثم تنقع فى ماء دافئ و نستخدمها اليوم التالى
بصلة حمراء متوسطة
عصير ليمونتين
ثلث كوب زيت زيتون أو زيت ذرة حسب الرغبة
ملح و فلفل إسود

الطريقة
تسلق الفاصوليا فى ماء و ملح حتى تنضج
يخلط الزين و الليمون و الفلفل الأسود
يقطع البصل حلقات رفيعة و تضاف الفاصوليا ثم يتبل الخليط بخلطة الزيت
 

==================================================
==================================================

سلاطة الزبادى
المكونات
ثوم ، خيار ، نعناع ، ملح ، زبادى
الطريقة
يبشر الخيار ، ممكن نقشره بس الأحسن نبشره بقشره
نضيف الزبادى و الثوم للخيار المبشور و نتبله بالملح حسب التذوق
تجمل بالنعناع

Tips & Tricks - 1

فى حاجات صغيرة كدة بتعمل فرق و تجديد ، كل لما أفتكر حاجة إن شاء الله هاكتبها

ممكن تغيرى طعم البانيه بإضافة حبة البركة على البقسماط و ممكن إضافة أى توابل تانية على حسب المزاج

محشى الباذنجان و الكوسة ممكن نسويه بطماطم بيطلع طعمه أحلى كثير

عبارة عن بصل مفروم نقلبه فى سمنة لحد ما يبقى شفاف و نحط عليه عصير الطماطم لحد ما يتسبك . طبعًأ نضيف التوابل اللى نحبها و بعدين نسوى فى الصلصة دى المحشى

أنا بحط خليط الطماطم ده فى خلطة المحشى كمان بس بزود على الخلطة نعناع بيدى طعم حلو فوق الوصف

محشى ورق العنب ممكن نسويه بالصوص اللى كان فى وصفة العرق الرستو ، الصوص ده عبارة عن خلاصة اللحمة مع الطماطم و الثوم و اليمون و البهارات فتخيلوا بقى قد إيه المحشى هايبقى طعمه حلو

سلطة بطاطس

المقادير

بطاطس

ثوم - فلفل أخضر - كمون - ليمون - طماطم - خل - نعناع

الطريقة

تسلق البطاطس و تقطع مكعبات

الصوص

يفرم الثوم و الفلفل الأخضر و الطماطم

نضيف الملح و الكمون والنعناع عصير الليمون و نقطة خل

تتبل البطاطس بالصوص و تقلب

تقدم دافئة أو باردة

ممكن كمان طريقة

تسلق البطاطس و تقطع مكعبات و صلصة التقديم عبارة عن صوص فرنسى (ملح ، فلفل إسود ، زيت زيتون ،عصير ليمون ) مع بقدونس

أو نفس الصوص و البقدونس و نضيف معاهم ثوم مفروم و شطة

و ممكن التتبيلة تكون فيها كمون و ممكن التنويع فى نوع الخضرة المضافة للبطاطس حسب الرغبة

صنية بطاطس بالفراخ

طريقة سهلة و لذيذة و مختلفة عن الطريقة التقليدية اللى بنسلق فيها الفراخ

المقادير

بطاطس حسب عدد الأفراد ، يعنى لكل فرد تقريبا 1.5 بطاطساية

فراخ - على حسب الكمية

بصل مفروم - طماطم مفرومة

ملح - فلفل - بهارات - فصين حبهان - ورقة لورا - رشة زعتر - عصير ليمون

الطريقة

تتبل الفراخ بالبصل و التوابل لمدة ساعتين على الأقل كأننا هانشويها و ممكن من بليل و ممكن لما تجيبوا الفراخ تغسلوها و تتبلوها و تشيلوها متبلة فى الفريزر لحين الإستعمال

تقشر البطاطس و تقطع شرائح

فى طبق الفرن نرص البطاطس و نرش فوقها الطماطم الفرومة أو عصير الطماطم و بعدين نحط الفراخ بالبصل بتاعها و نرش فوقها باقى الطماطم المفرومة أو العصير

و نلفها بالفويل ة نحطها فى الفرن حوالى ساعة و بعدين نفتح الغطاء و نسيبها نص ساعة بالكثير و ممكن بعد كده لو ماحمتش أوى نفتح عليها الشواية دقيقتين

و بالهنا و الشفا

الصلصة البيضاء - البشامل

بناءًا على طلب الجماهير دى طريق عمل البشامل ، طبعًا زى الإعلان ما بيقول البشامل ده له ناسه :) يعنى طبعًا لو مالكومش خلق تقلبوا و تصبروا و تفشلوا علشان توصلوا للنجاح من الممكن دائمًا شراء الأكياس الجاهزة مع خالص الشكر للتكنولجيا اللى بتوفر الوقت و المجهود

المقادير :

طبعًا المقادير تختلف على حسب السمك ، يعنى الصلصة البيضاء عبارة عن دقيق و سمنة و لبن . السمنة تكون نفس مقدار الدقيق علشان المفروض يكون سايح فيها و بعدين نضيف اللبن بعد تحمير الدقيق خفيف فى السمنة و على قد ما هنحط دقيق على قد ما الخليط هايطلع سميك

يعنى معلقتين الدقيق معاهم معلقتين سمنة تقريباً و ياخدوا كوباية لبن كبيرة و لو تقيل ممكن نزود لبن

لو هانستخدم البشامل على وش صنية بنضيف بيضة علشان دى اللى بتحمر الوش . الملح و الفلفل يضافوا حسب الرغبة لإن البشامل ممكن يستخدم فى الحلويات زى صنية القرع العسلى

المهم المقادير الأساسية

كوب دقيق

كوب سمن

كيلو لبن

الطريقة

يحمر الدقيق فى السمن ثم يضاف اللبن مع التقليب المستمر لحد لما نوصل للقوام المطلوب

فى طريقة أسهل للبشامل ، ندوب الدقيق فى اللبن على البارد و بعدين نرفعهم على النار لحد ما يتقلوا و بعدين و نحط معلقة سمنة و نقلب علشان تدى طعم . ممكن نقلل مقدار السمنة فى الطريقة العادية بس أهم حاجة إن حبات الدقيق تتغطى بالسمن و تتحمر . كله بيجى بالتجربة و الخطأ

حظ سعيد

عرق اللحمة روستو

المقادير

عرق لحمة

ثوم مفروم - حوالى رأس ثوم صغيرة ، كل ما نكثر الثوم كل لما يكون أحسن

بهارات

ملح و فلفل إسود

كوباية كبيرة عصير طماطم

عصير 5 ليمونات

ملعقة كبيرة سمنة

الطريقة

يلف العرق بالدوبارة

يهرس الثوم مع البهارات و الملح و الفلفل

نعمل فتحات فى عرق اللحمة و نحشيها بخلطو الثوم

ثم ندهن باقى الخليط على اللحم من الخارج

نحطها فى بايركس و نسقيها بعصير الطماطم و الليمون و نحط معاها معلقة السمن

و نغطيها و نسويها فى الفرن

تقدم مع أرز ، أبيض أو بالخلطة و خضار سوتيه